Adolygiad Cyfnodol - Cyngor Ceiropracteg Cyffredinol 2022/23

Rydym wedi cyhoeddi ein hadroddiad diweddaraf ar gyfer y Cyngor Ceiropracteg Cyffredinol (GCC).

Ystadegau allweddol

• Mae'r GCC yn rheoleiddio ceiropractyddion yn y DU
• Roedd 3,640 o weithwyr proffesiynol ar ei gofrestr (ar 30 Mehefin 2023)

Canfyddiadau allweddol

Cydraddoldeb, Amrywiaeth a Chynhwysiant (EDI)

Mae’r GCC yn parhau i ddangos ei ymrwymiad i EDI ac mae wedi gwneud cynnydd da wrth roi ei gynllun gweithredu ar waith. Creodd Weithgor EDI a chyhoeddodd bolisi EDI newydd, gyda Phecyn Cymorth EDI atodol ar gyfer cofrestreion. Cynhaliodd hefyd, ac adroddodd ar, adolygiad thematig o achosion a gaewyd gan ei Bwyllgor Ymchwilio. Ni chanfu’r adolygiad unrhyw bryderon am brosesau’r GCC ond nododd rai meysydd i’w datblygu ymhellach, megis gwella amrywiaeth pwyllgorau addasrwydd i ymarfer. Defnyddiodd y GCC ei ymgyrch recriwtio ym mis Chwefror 2023 fel cyfle i arallgyfeirio ei gronfa o aelodau IC ymhellach.

Cymuned Cleifion

Yn gynnar yn 2022, sefydlodd y GCC ei Gymuned Cleifion - grŵp cynghori sy'n cynnwys 20 o gleifion ceiropracteg, i gael dealltwriaeth ddyfnach o'r profiad ceiropracteg o safbwynt claf. Eleni, cyhoeddodd y GCC ddau adroddiad ar ymchwil a gynhaliwyd gyda'r grŵp: Proffesiynoldeb, Safbwynt y Cleifion; a Chydsyniad, Safbwynt y Cleifion. Roedd y gwaith hwn yn llywio datblygiad canllawiau a phecynnau cymorth y GCC ar gyfer y proffesiwn.

Safonau Addysg Newydd

Cyflwynodd y GCC Safonau Addysg newydd eleni. Cafodd datblygiad y Safonau ei lywio gan ymgynghoriad cyhoeddus, grwpiau ffocws gyda rhanddeiliaid allweddol a chyhoeddiadau a chanllawiau gan sefydliadau perthnasol eraill. Mae'r Safonau newydd yn rhoi mwy o bwyslais ar ofal sy'n canolbwyntio ar y claf, EDI a gwaith cydweithredol ac integredig gyda gweithwyr gofal iechyd proffesiynol eraill. Mae’r GCC yn cefnogi darparwyr addysg presennol i roi’r newidiadau ar waith ac mae ganddo gynlluniau pontio ac amserlenni ar waith ar gyfer pob darparwr. Mae’r GCC yn rhagweld y bydd y rhan fwyaf o ddarparwyr yn derbyn myfyrwyr i gymwysterau sy’n bodloni’r Safonau newydd o flwyddyn academaidd 2024/25.

Amseroldeb addasrwydd i ymarfer

Ni chyflawnodd y GCC Safon 15 y llynedd oherwydd ei bod yn cymryd gormod o amser i symud ymlaen ag ymchwiliadau addasrwydd i ymarfer. Eleni, bu gwelliant sylweddol yn yr amser a gymerir o dderbyn atgyfeiriad i benderfyniad addasrwydd i ymarfer terfynol, felly rydym yn fodlon bod Safon 15 wedi'i bodloni. Fodd bynnag, mae'r amser a gymerir o atgyfeirio i benderfyniad IC wedi cynyddu am yr ail flwyddyn yn olynol. Rhaid i’r GCC sicrhau ei fod yn symud achosion ymlaen yn brydlon ac nad yw’n caniatáu i ôl-groniad o achosion hŷn gronni.

Penderfyniadau addasrwydd i ymarfer

Cynhaliwyd archwiliad o'r penderfyniadau a wnaed yn IC eleni. Canfuom fod gan y GCC reolaethau rhesymol a chymesur ar waith i sicrhau gwneud penderfyniadau da a bod y rheolaethau hynny’n gweithio’n effeithiol ar y cyfan. Roedd bron pob un o’r penderfyniadau IC a adolygwyd gennym yn rhesymol, gyda rhesymau clir, cywir a manwl wedi’u cofnodi. Dim ond nifer fach o faterion a welsom mewn perthynas â phenderfyniadau a chawsom ein cysuro o weld tystiolaeth bod y GCC yn nodi ac yn gweithredu dysgu pan oedd materion yn codi.