Ein hadolygiadau perfformiad o reoleiddwyr

Rydym yn gwirio pa mor dda y mae sefydliadau sy'n rheoleiddio pobl sy'n gweithio ym maes iechyd a gofal cymdeithasol yn gwneud eu gwaith. Bob blwyddyn, rydym yn adrodd ar y 10 rheolydd rydym yn eu goruchwylio i wneud yn siŵr eu bod yn amddiffyn y cyhoedd yn iawn. Rydym yn rhoi adborth ar yr hyn y maent yn ei wneud yn dda a sut y gallant wneud yn well. 

Sut rydym yn defnyddio adolygiadau perfformiad

Rydym yn defnyddio ein hadolygiadau perfformiad i: 

• dweud wrth y cyhoedd pa mor dda y mae rheolyddion yn bodloni ein Safonau Rheoleiddio Da 
• helpu rheolyddion i wella drwy nodi eu cryfderau a meysydd i’w gwella.  

Ein cylch adolygu a'r adroddiadau dilynol

Cynhelir ein hadolygiadau perfformiad dros gylch tair blynedd.  

Bob tair blynedd, rydym yn cynnal 'adolygiad cyfnodol' dwys ac yn y ddwy flynedd arall, rydym yn monitro perfformiad ac yn cynhyrchu adroddiadau byrrach. Gallwn gynnal adolygiad cyfnodol yn gynt os byddwn yn nodi risgiau neu bryderon newydd. 

Yna byddwn yn cyhoeddi adroddiadau yn esbonio sut rydym yn barnu perfformiad pob rheolydd. Cyfeiriwn at y rhain fel ein 'hadolygiadau perfformiad'. Rydym yn cyhoeddi dau fath o adroddiad sy’n amlinellu sut mae’r rheolyddion yn bodloni ein Safonau Rheoleiddio Da:

1. adroddiadau hirach, manylach y cyfeiriwn atynt fel adolygiadau cyfnodol
2. adroddiadau trosolwg byrrach y cyfeiriwn atynt fel adroddiadau monitro.

Sut rydym yn cynnal adolygiadau perfformiad  

Bob blwyddyn, rydym yn edrych ar bob rheolydd gan ddefnyddio proses adolygu perfformiad drylwyr ac rydym yn: 

• adolygu gwybodaeth y mae'r rheolydd yn ei chyhoeddi 
• edrych ar ddata ar eu prosesau cofrestru ac addasrwydd i ymarfer 
• gwirio eu cofrestr gyhoeddus 
• adolygu eu penderfyniadau addasrwydd i ymarfer (dyma’r penderfyniadau a wneir am gwynion neu bryderon difrifol yn erbyn gweithwyr iechyd a gofal proffesiynol) 
• ystyried adborth gan bobl sydd wedi delio â'r rheolydd a rhannu eu profiad gyda ni. 

Anelu bob amser at wella safonau

Hyd yn oed pan fydd rheolydd yn cyrraedd ein safonau, mae lle i wella bob amser. Rydym yn cadw llygad ar feysydd lle gallant wella.