Yr Awdurdod yn cyhoeddi ei adolygiad o berfformiad y Cyngor Nyrsio a Bydwreigiaeth ar gyfer 2020/21

Rydym wedi cyhoeddi ein hadolygiad perfformiad blynyddol o'r Cyngor Nyrsio a Bydwreigiaeth . Bob blwyddyn rydym yn cynnal adolygiad perfformiad o'r 10 rheolydd proffesiynol iechyd a gofal. Gwiriad yw hwn o sut mae’r rheolyddion wedi perfformio yn erbyn ein Safonau Rheoleiddio Da (y Safonau) fel eu bod yn amddiffyn y cyhoedd ac yn hybu hyder mewn gweithwyr iechyd a gofal proffesiynol.

Eleni canfuom fod yr NMC wedi bodloni 17 o’r 18 Safon. Ni chyflawnodd yr NMC Safon 15 sy’n ei gwneud yn ofynnol iddo ymdrin â chwynion addasrwydd i ymarfer mor gyflym ag sy’n gyson â datrysiad teg. Cynyddodd yr amser a gymerwyd i wneud penderfyniadau am gwynion eto eleni, wrth i effeithiau’r pandemig amharu ar allu’r NMC i ddelio ag achosion.

Mae’r NMC yn gweithredu rhaglen waith eang i wella ei berfformiad yn y maes hwn, ond nid yw’n rhagweld y bydd effaith llawer o’i fesurau arfaethedig i’w gweld am beth amser. Rydym yn croesawu’r ffocws clir a’r ysgogiad ar gyfer gwelliant y mae’r NMC wedi’u dangos. Fodd bynnag, yn absenoldeb tystiolaeth o welliannau sylweddol i berfformiad yn y cyfnod cynnar hwn, ni chyrhaeddwyd y Safon am yr ail flwyddyn yn olynol.

Gallwch ddarganfod mwy am sut y daethom i’n penderfyniad yn ein Hadolygiad Perfformiad - NMC 2020/21 neu darllenwch grynodeb yn ein ciplun .

 DIWEDD

Awdurdod Safonau Proffesiynol ar gyfer Iechyd a Gofal Cymdeithasol

Cyswllt: media@professionalstandards.org.uk

Nodiadau i'r Golygydd

1. Mae’r Awdurdod Safonau Proffesiynol ar gyfer Iechyd a Gofal Cymdeithasol yn goruchwylio 10 corff statudol sy’n rheoleiddio gweithwyr iechyd a gofal cymdeithasol proffesiynol yn y DU.
2. Rydym yn asesu eu perfformiad ac yn adrodd i'r Senedd. Rydym hefyd yn cynnal archwiliadau ac ymchwiliadau a gallwn apelio yn erbyn achosion addasrwydd i ymarfer i’r llysoedd os ydym o’r farn nad yw sancsiynau’n ddigonol i ddiogelu’r cyhoedd a’i fod er budd y cyhoedd.
3. Rydym hefyd yn gosod safonau ar gyfer sefydliadau sy'n dal cofrestrau gwirfoddol ar gyfer galwedigaethau iechyd a gofal cymdeithasol ac yn achredu'r rhai sy'n eu bodloni.
4. Rydym yn rhannu arfer da a gwybodaeth, yn cynnal ymchwil ac yn cyflwyno syniadau newydd i'n sector. Rydym yn monitro datblygiadau polisi yn y DU ac yn rhyngwladol ac yn rhoi cyngor ar faterion yn ymwneud â safonau proffesiynol mewn iechyd a gofal cymdeithasol.
5. Gwnawn hyn i hybu iechyd, diogelwch a lles defnyddwyr gwasanaethau iechyd a gofal cymdeithasol a'r cyhoedd. Rydym yn gorff annibynnol, yn atebol i Senedd y DU.
6. Mae’r Cyngor Nyrsio a Bydwreigiaeth (yr NMC) yn rheoleiddio’r proffesiynau nyrsio a bydwreigiaeth yn y Deyrnas Unedig a chymdeithion nyrsio yn Lloegr. Mae ei waith yn cynnwys: gosod a chynnal safonau ymarfer ac ymddygiad; cynnal cofrestr o weithwyr proffesiynol cymwys; sicrhau ansawdd addysg a hyfforddiant i nyrsys, bydwragedd a chymdeithion nyrsio; ei gwneud yn ofynnol i gofrestreion gadw eu sgiliau'n gyfredol trwy ddatblygiad proffesiynol parhaus; a chymryd camau i gyfyngu ar neu ddileu unigolion cofrestredig nad ydynt yn cael eu hystyried yn addas i ymarfer. Ar 30 Medi 2021, roedd yr NMC yn gyfrifol am gofrestr o 744,929 o nyrsys, bydwragedd a chymdeithion nyrsio. Ei ffi gadw flynyddol ar gyfer cofrestreion yw £120.
7. Ein gwerthoedd yw – uniondeb, tryloywder, parch, tegwch a gwaith tîm – ac rydym yn ymdrechu i sicrhau eu bod yn greiddiol i’n gwaith.
8. Mae rhagor o wybodaeth am ein gwaith a’r dull a gymerwn ar gael yn www.professionalstandards.org.uk