Rhwystrau i gwynion

Dechreuwyd y flwyddyn newydd gyda'n seminar ar-lein ar y cyd ar fynd i'r afael â rhwystrau i gwynion gyda'r Ombwdsmon Seneddol a Gwasanaeth Iechyd (PHSO). Roedd y digwyddiad yn dilyn ar sodlau digwyddiad personol cynharach gyda sefydliadau cleifion a defnyddwyr gwasanaeth a gynhaliwyd yng Nghaeredin ym mis Medi 2023. 

Daeth y digwyddiad â dros 100 o randdeiliaid ynghyd o bob rhan o’r sector iechyd a gofal cymdeithasol i drafod ac archwilio’r rhwystrau sy’n bodoli ar hyn o bryd ac a all atal cleifion a defnyddwyr gwasanaeth rhag cwyno. Ynghyd â'n cydweithwyr PHSO, roeddem am rannu enghreifftiau o gamau arloesol i ehangu a gwella mynediad at wasanaethau cwynion ac i annog a hyrwyddo gwaith ar y cyd pellach i fynd i'r afael â rhwystrau i gwyno. 

Roedd y digwyddiad yn cynnwys siaradwyr o National Voices a Healthwatch England a osododd y cefndir ar gyfer deall profiad y claf o wneud cwynion a’r hyn y mae cleifion ei eisiau o systemau cwynion yn y dyfodol. Yna aeth y rhai a oedd yn bresennol i sesiynau trafod â thema i drafod mathau penodol o rwystrau i gwyno a chamau posibl yn y tymor byr, canolig a hir a allai helpu i wella’r profiad o wneud cwynion yn ogystal â’r defnydd a wneir o wybodaeth am gwynion o fewn y system i hyrwyddo dysgu a gwelliant.

Roedd themâu cryf yn gysylltiedig â'r digwyddiad blaenorol yn edrych ar fynd i'r afael ag anghydraddoldebau iechyd - roedd yn amlwg nad yw'n bosibl mynd i'r afael yn effeithiol â phrofiadau gwahaniaethol o ran mynediad pobl at ofal ac ansawdd gofal oni bai ein bod yn gwybod y problemau y maent yn eu hwynebu. Hefyd, er bod y system gwynion yn gymhleth a bod gwahaniaethau ar draws sefydliadau, mae'n amlwg bod llawer o rwystrau a rennir y gellid mynd i'r afael â hwy drwy gydweithredu.   

Ar y cyfan, roedd yn ddigwyddiad bywiog a defnyddiol sydd wedi rhoi llawer i ni feddwl amdano o ran camau pellach y mae’r PSA yn eu cymryd yn y maes hwn yn ystod 2024/25 yn unol â’n hymrwymiadau mewn Gofal Mwy Diogel i bawb .