Awdurdod Safonau Proffesiynol yn dyfarnu Marc Ansawdd i Gymdeithas Hylendid Galwedigaethol Prydain

Heddiw, mae'r Awdurdod Safonau Proffesiynol ar gyfer Iechyd a Gofal Cymdeithasol (PSA) wedi achredu Cymdeithas Hylendid Galwedigaethol Prydain (BOHS). Mae’r PSA yn gorff statudol annibynnol, sy’n atebol i’r Senedd.

O dan y rhaglen Cofrestrau Achrededig, bydd ymarferwyr sydd wedi'u cofrestru gyda'r BOHS nawr yn gallu dangos y Marc Ansawdd Cofrestrau Achrededig, arwydd clir bod y Gofrestr yn bodloni Safonau'r PSA ar gyfer Cofrestrau Achrededig.

Mae cofrestru gyda Chofrestr Achrededig yn rhoi hyder i gyflogwyr a chleifion, defnyddwyr gwasanaeth a’r cyhoedd fod ymarferwyr wedi ymrwymo i godau proffesiynol a moesegol cadarn. Rhaid i bob Cofrestr a achredir gan yr Awdurdod fod â phrosesau cwyno tryloyw fel y gellir mynd i'r afael â pherfformiad gwael. Pan fydd camwedd difrifol yn digwydd, bydd yr ymarferydd yn cael ei dynnu oddi ar y Gofrestr.

Y BOHS yw’r corff arweiniol ar gyfer hylendid galwedigaethol yn y DU a dyfarnwyd statws Siartredig Brenhinol iddo yn 2012.  

Dywedodd Alan Clamp, Prif Weithredwr yr Awdurdod Safonau Proffesiynol: “Rydym yn falch iawn o achredu’r BOHS. Mae dod â'r ymarferwyr hyn i fframwaith eang o sicrwydd yn beth da i gyflogwyr a'r cyhoedd a dyma'r ffordd orau o hyrwyddo ansawdd. Mae’r rhaglen Cofrestrau Achrededig yn cynnig haen o amddiffyniad i bobl sy’n derbyn gwasanaethau iechyd ac yn rhoi cyfle i’r ymarferwyr ar Gofrestr BOHS ddangos eu hymrwymiad i arfer da.”
 

Gwybodaeth gefndir

Nid yw achrediad yn awgrymu bod y PSA wedi asesu rhinweddau unigolion ar y gofrestr. Mae hyn yn parhau i fod yn gyfrifoldeb y BOHS. Mae achrediad yn golygu bod y BOHS yn bodloni safonau uchel yr Awdurdod Safonau Proffesiynol o ran llywodraethu, gosod safonau, addysg a hyfforddiant, rheoli'r gofrestr, ymdrin â chwynion a gwybodaeth.

Mae Cofrestrau Achrededig yn cwmpasu ystod gynyddol o alwedigaethau a sefydliadau a gall yr Awdurdod Safonau Proffesiynol achredu mwy nag un gofrestr mewn unrhyw alwedigaeth benodol. Mae rhagor o wybodaeth am Gofrestrau Achrededig ar gael yn www.professionalstandards.org.uk/what-we-do/accredited-registers

DIWEDD
 

Awdurdod Safonau Proffesiynol ar gyfer Iechyd a Gofal Cymdeithasol
E-bost: media@professionalstandards.org.uk
 

Nodiadau i'r Golygydd

1. Mae’r Awdurdod Safonau Proffesiynol ar gyfer Iechyd a Gofal Cymdeithasol yn goruchwylio 10 corff statudol sy’n rheoleiddio gweithwyr iechyd a gofal cymdeithasol proffesiynol yn y DU.
2. Rydym yn asesu eu perfformiad ac yn adrodd i'r Senedd. Rydym hefyd yn cynnal archwiliadau ac ymchwiliadau a gallwn apelio yn erbyn achosion addasrwydd i ymarfer i’r llysoedd os ydym o’r farn nad yw sancsiynau’n ddigonol i ddiogelu’r cyhoedd a’i fod er budd y cyhoedd.
3. Rydym hefyd yn gosod safonau ar gyfer sefydliadau sy'n dal cofrestrau gwirfoddol ar gyfer galwedigaethau iechyd a gofal cymdeithasol ac yn achredu'r rhai sy'n eu bodloni.
4. Rydym yn rhannu arfer da a gwybodaeth, yn cynnal ymchwil ac yn cyflwyno syniadau newydd i'n sector. Rydym yn monitro datblygiadau polisi yn y DU ac yn rhyngwladol ac yn rhoi cyngor ar faterion yn ymwneud â safonau proffesiynol mewn iechyd a gofal cymdeithasol.
5. Gwnawn hyn i hybu iechyd, diogelwch a lles defnyddwyr gwasanaethau iechyd a gofal cymdeithasol a'r cyhoedd. Rydym yn gorff annibynnol, yn atebol i Senedd y DU.
6. Ein gwerthoedd yw – uniondeb, tryloywder, parch, tegwch a gwaith tîm – ac rydym yn ymdrechu i sicrhau eu bod yn greiddiol i’n gwaith.

Mae rhagor o wybodaeth am ein gwaith a’r dull a gymerwn ar gael yn www.professionalstandards.org.uk