Adolygiad Cyfnodol - Cyngor Proffesiynau Iechyd a Gofal 2022/23

Rydym wedi cyhoeddi ein hadroddiad diweddaraf ar gyfer y Cyngor Proffesiynau Iechyd a Gofal (HCPC).

Ystadegau allweddol

• Mae’r HCPC yn rheoleiddio ymarfer 15 o broffesiynau perthynol i iechyd yn y Deyrnas Unedig
• Roedd 320,594 o weithwyr proffesiynol ar ei gofrestr (ar 31 Mawrth 2023)

Canfyddiadau allweddol

Addasrwydd i Ymarfer

Rydym wedi cael pryderon sylweddol yn y gorffennol am systemau addasrwydd i ymarfer yr HCPC. Ers mis Ionawr 2021, mae’r HCPC wedi cyflymu ei raglen gwella addasrwydd i ymarfer i fynd i’r afael â’n pryderon, gan gwmpasu ymchwiliadau, gwneud penderfyniadau, gorchmynion interim a chymorth a ddarperir i bartïon sy’n ymwneud ag achosion. Rydym wedi gweld gwelliannau o ran gwneud penderfyniadau ar draws pob cam o’r broses addasrwydd i ymarfer, ac mewn asesiadau risg. Rydym yn cydnabod y gwaith sydd wedi'i wneud i wneud y gwelliannau hyn ac rydym yn falch o adrodd bod yr HCPC wedi bodloni Safonau 16 a 17 eleni ac eto wedi bodloni Safon 14. Rydym wedi gweld rhai gwelliannau yn ansawdd yr ymchwiliadau a'r cymorth a ddarperir i bartïon, ond ni chawsom sicrwydd llawn bod y pryderon a nodwyd gennym yn flaenorol yn y meysydd hyn wedi'u lliniaru'n llawn. Rydym hefyd yn parhau i bryderu am yr amser y mae’r HCPC yn ei gymryd i symud achosion ymlaen drwy ei system addasrwydd i ymarfer. Felly nid yw'r HCPC wedi bodloni Safonau 15 a 18 eleni. Byddwn yn parhau i fonitro rhaglen wella barhaus yr HCPC.

Amseroedd prosesu cofrestru

Y llynedd, roeddem yn bryderus ynghylch faint o amser yr oedd yn ei gymryd i’r HCPC brosesu ceisiadau rhyngwladol i gofrestru. Er mwyn gwella gwasanaethau, gwnaeth yr HCPC nifer o newidiadau i'w brosesau cofrestru sydd wedi arwain at welliant yn yr amser a gymerir i brosesu ceisiadau rhyngwladol. Rydym yn cymeradwyo gwaith yr HCPC yn y maes hwn, yn enwedig gan fod nifer y ceisiadau rhyngwladol a dderbyniodd yn ystod y cyfnod adolygu hwn wedi cynyddu'n sylweddol. Mae'r HCPC felly wedi bodloni Safon 11 ar gyfer cofrestru eleni. Rydym yn annog yr HCPC i barhau i wella ei brosesau a'r gwasanaethau a ddarperir i ymgeiswyr.