Ymateb y PSA i ddatganiad y Cyngor Nyrsio a Bydwreigiaeth ar fater y broses gofrestru

Ym mis Chwefror 2026, fe’n hysbyswyd gan y Cyngor Nyrsio a Bydwreigiaeth (NMC) nad oedd nifer sylweddol o ddatganiadau iechyd a chollfarnau troseddol wedi’u trin yn unol â’i ganllawiau cyhoeddedig ar gofrestru ac ailddilysu. Fe’n hysbyswyd gan y NMC fod hyn wedi bod yn digwydd ers 12 mlynedd. Mae hyn yn codi risg diogelu’r cyhoedd oherwydd nad oedd datganiadau a wnaed gan rai ymgeiswyr a gweithwyr proffesiynol yn cael eu cyfeirio’n gyson at Gofrestrydd Cynorthwyol fel y dylent fod wedi’i wneud. 

Mae'r Cyngor Nyrsio a Bydwreigiaeth (NMC) wedi cynnal adolygiad o'r holl geisiadau yr effeithiwyd arnynt ac wedi nodi ei gamau nesaf ynghylch y 421 o achosion lle mae angen ymchwiliadau pellach. Ers ein hysbysu am y mater, mae'r NMC wedi darparu diweddariadau wythnosol ar ei adolygiad. Mae'r tryloywder hwn wedi bod yn bwysig i ganiatáu inni gael golwg ar y cynnydd y mae'r NMC yn ei wneud i unioni'r sefyllfa er budd diogelu'r cyhoedd gan fod yn ystyriol o lesiant y gweithwyr proffesiynol dan sylw.

Mae hwn yn fethiant difrifol ar raddfa sy'n dod â risg sylweddol i ddiogelwch y cyhoedd ac yn tanseilio uniondeb cofrestr yr NMC. Er bod yr NMC wedi ymateb yn dilyn y darganfyddiad hwn, mae hefyd yn hanfodol deall yn llawn sut y gallai hyn ddigwydd a chymryd camau brys ac effeithiol i sicrhau bod ei weithrediadau rheoleiddio yn gweithio'n effeithiol. Mae'n hanfodol na chaniateir i faterion fel hyn ddigwydd eto. Mae'r NMC wedi rhoi mesurau ar waith gyda'r nod o gyflawni hyn a byddwn yn monitro'r camau gweithredu hyn fel rhan o'n hadolygiad perfformiad 2025/26, sy'n cwmpasu'r cyfnod Ionawr - Rhagfyr 2026.

Rydym wedi ystyried y mater hwn fel rhan o'n hadolygiad perfformiad ar gyfer 2024/25 a fydd yn cael ei gyhoeddi'n fuan. Fodd bynnag, byddwn yn ystyried effeithiolrwydd camau gweithredu'r Cyngor Nyrsio a Bydwreigiaeth i fynd i'r afael â'r risg diogelu'r cyhoedd a gwella ei systemau'n fwy llawn yn ein hadolygiad perfformiad ar gyfer 2025/26.

DIWEDD

Awdurdod Safonau Proffesiynol ar gyfer Iechyd a Gofal Cymdeithasol

Cyswllt: media@professionalstandards.org.uk