Adolygiad yr Awdurdod o berfformiad y Cyngor Meddygol Cyffredinol 2017/18

Mae'r Awdurdod Safonau Proffesiynol wedi cyhoeddi ei adolygiad perfformiad blynyddol o'r Cyngor Meddygol Cyffredinol . Rydym yn adolygu pob un o'r rheolyddion iechyd a gofal cymdeithasol statudol bob blwyddyn i asesu a ydynt yn bodloni ein Safonau Rheoleiddio Da . Ar adeg yr asesiad, roedd cofrestr y GMC yn cwmpasu tua 298,000 o feddygon a oedd yn ymarfer yn y Deyrnas Unedig.

Mae'n bleser gennym adrodd bod y GMC yn parhau i fodloni'r holl Safonau Rheoleiddio Da.

O fewn ein hadolygiad perfformiad eleni, fe wnaethom gynnal archwiliad o ddefnydd y GMC o ymholiadau dros dro. Ymholiadau yw'r rhain y mae'r GMC yn eu cynnal ar gam cychwynnol achos i benderfynu a oes angen ymchwiliad llawn. Cawsom wybodaeth gan y GMC a oedd yn dangos bod ei ddefnydd o ymholiadau dros dro yn gyson â'r flwyddyn flaenorol, a bod ganddo fesurau ar waith i sicrhau ansawdd penderfyniadau.

Ar y cyfan, roeddem o'r farn bod canlyniadau ymholiadau dros dro yn rhesymol ac yn briodol. Nid oedd y dystiolaeth a gasglwyd gennym yn ein harchwiliad yn nodi bod defnydd y GMC o ymholiadau dros dro yn ei gwneud yn anoddach i bobl godi pryderon am addasrwydd i ymarfer cofrestryddion GMC.

Mae rhagor o wybodaeth am sut y daethom i’n penderfyniad wedi’i nodi yn ein Hadolygiad Perfformiad – GMC 2017/18 neu darllenwch grynodeb yn ein ciplun .

Awdurdod Safonau Proffesiynol ar gyfer Iechyd a Gofal Cymdeithasol

Cyswllt: 

Christine Braithwaite, Cyfarwyddwr Safonau a Pholisi

E: Christine.Braithwaite@professionalstandards.org.uk

Derbynfa: 020 7389 8030

Nodiadau i'r Golygydd

1. Mae’r Awdurdod Safonau Proffesiynol ar gyfer Iechyd a Gofal Cymdeithasol yn goruchwylio naw corff statudol sy’n rheoleiddio gweithwyr iechyd a gofal cymdeithasol proffesiynol yn y DU.
2. Rydym yn asesu eu perfformiad ac yn adrodd i'r Senedd. Rydym hefyd yn cynnal archwiliadau ac ymchwiliadau a gallwn apelio yn erbyn achosion addasrwydd i ymarfer i’r llysoedd os ydym o’r farn nad yw sancsiynau’n ddigonol i ddiogelu’r cyhoedd a’i fod er budd y cyhoedd.
3. Mae'r Safonau Rheoleiddio Da wedi'u cynllunio i sicrhau bod y rheolyddion yn amddiffyn y cyhoedd ond hefyd yn hybu hyder mewn gweithwyr iechyd a gofal proffesiynol a nhw eu hunain. Mae'r Safonau'n cwmpasu pedair swyddogaeth graidd y rheolyddion: gosod a hyrwyddo canllawiau a safonau ar gyfer y proffesiwn; gosod safonau a sicrhau ansawdd y ddarpariaeth addysg a hyfforddiant; cynnal cofrestr o weithwyr proffesiynol; a chymryd camau lle gallai addasrwydd gweithiwr proffesiynol i ymarfer gael ei amharu.
4. Rydym hefyd yn gosod safonau ar gyfer sefydliadau sy'n dal cofrestrau gwirfoddol ar gyfer galwedigaethau iechyd a gofal cymdeithasol ac yn achredu'r rhai sy'n eu bodloni.
5. Rydym yn rhannu arfer da a gwybodaeth, yn cynnal ymchwil ac yn cyflwyno syniadau newydd i'n sector. Rydym yn monitro datblygiadau polisi yn y DU ac yn rhyngwladol ac yn rhoi cyngor ar faterion yn ymwneud â safonau proffesiynol mewn iechyd a gofal cymdeithasol.
6. Gwnawn hyn i hybu iechyd, diogelwch a lles defnyddwyr gwasanaethau iechyd a gofal cymdeithasol a'r cyhoedd. Rydym yn gorff annibynnol, yn atebol i Senedd y DU.
7. Mae ein gwerthoedd wrth wraidd pwy ydym ni a beth rydym yn ei wneud. Rydym wedi ymrwymo i fod yn ddiduedd, yn deg, yn hygyrch ac yn gyson wrth gymhwyso ein gwerthoedd.
8. Mae'r Cyngor Meddygol Cyffredinol (y GMC) yn rheoleiddio ymarfer meddygon yn y Deyrnas Unedig. Mae ei waith yn cynnwys: gosod safonau ar gyfer addysg a hyfforddiant meddygon, achredu darparwyr addysg a hyfforddiant, cymeradwyo cymwysterau a sicrhau ansawdd addysg a hyfforddiant meddygol; gosod a chynnal safonau ymddygiad, moeseg a pherfformiad ar gyfer meddygon; rheoli cofrestr o weithwyr proffesiynol cymwys; cymryd camau i gyfyngu ar neu ddileu unigolion cofrestredig yr ystyrir nad ydynt yn addas i ymarfer. Ar 30 Medi 2018, roedd 298,011 o feddygon ar y gofrestr. Y ffi ar gyfer cofrestru gyda thrwydded i ymarfer yw £390, a £140 i gofrestru heb drwydded i wneud gwaith meddygol (mae ffioedd gostyngol yn berthnasol i feddygon sydd newydd gymhwyso).
9. Mae rhagor o wybodaeth am ein gwaith a’r dull a gymerwn ar gael yn www.professionalstandards.org.uk