Mae PSA yn croesawu cyhoeddi cynllun gweithlu hirdymor y GIG

Mae’r Awdurdod Safonau Proffesiynol (PSA) yn croesawu cyhoeddi cynllun gweithlu hirdymor y GIG ar gyfer Lloegr. Mae pwysau gweithlu yn her enfawr i ansawdd a diogelwch gofal. Mae angen gweithredu i sicrhau bod gennym y gweithlu sydd ei angen arnom yn awr ac yn y dyfodol, ac mae gan reoleiddio ran bwysig i’w chwarae yn hyn.

Yn ein hadroddiad diweddar Gofal Mwy Diogel i Bawb , gwnaethom argymell bod rheolyddion proffesiynol a Chofrestrau Achrededig yn cydweithio i nodi cyfleoedd i gyflymu cyflenwad y gweithlu, arfogi ymarferwyr i ymdrin â heriau yn y dyfodol o ran sut mae gofal yn cael ei ddarparu, cau bylchau diogelwch ac amddiffyn cleifion a defnyddwyr gwasanaeth . Rydym yn falch o weld bod y cynllun yn cefnogi'r negeseuon yn ein hadroddiad.

Mae diwygiadau i reoleiddio proffesiynol yn rhan o'r darlun a dylid eu cyflwyno cyn gynted â phosibl i roi mwy o ystwythder i reoleiddwyr, tra'n cydbwyso'r ymdrech i sicrhau effeithlonrwydd â'r angen i ddiogelu'r cyhoedd.

Gan fod y gweithlu heb ei reoleiddio yn rhan gynyddol bwysig o’r gwasanaeth iechyd, mae rôl allweddol i Gofrestrau Achrededig hefyd o ran rhoi sicrwydd bod ymarferwyr yn gymwys.

Dywedodd Alan Clamp, Prif Weithredwr,

'Rydym yn falch o weld cynllun gweithlu'r GIG yn cael ei gyhoeddi. Byddwn yn archwilio'r cynllun yn fanwl ac yn gweithio gyda rheoleiddwyr, Cofrestrau Achrededig, y Llywodraeth a chydweithwyr yn y GIG ar y camau nesaf. Ochr yn ochr â’r ymgyrch i gynyddu niferoedd a gwella cyfraddau cadw, bydd angen i’r GIG a’r Llywodraeth feddwl am sut i gynnal diogelwch cleifion a sicrhau cydlyniant ar draws y DU.

'I gefnogi hyn, dylai pedair Llywodraeth y DU ddatblygu strategaeth ar gyfer rheoleiddio pobl i gyd-fynd â chynlluniau gweithlu cenedlaethol. Byddai hyn yn helpu i benderfynu ar reolaethau rheoleiddio priodol ar gyfer rolau newydd neu esblygol tra'n cefnogi hyblygrwydd ac effeithlonrwydd.'

DIWEDD

Awdurdod Safonau Proffesiynol ar gyfer Iechyd a Gofal Cymdeithasol
E-bost: media@professionalstandards.org.uk

Nodiadau i'r Golygydd

1. Mae’r Awdurdod Safonau Proffesiynol ar gyfer Iechyd a Gofal Cymdeithasol yn goruchwylio 10 corff statudol sy’n rheoleiddio gweithwyr iechyd a gofal cymdeithasol proffesiynol yn y DU.
2. Rydym yn asesu eu perfformiad ac yn adrodd i'r Senedd. Rydym hefyd yn cynnal archwiliadau ac ymchwiliadau a gallwn apelio yn erbyn achosion addasrwydd i ymarfer i’r llysoedd os ydym o’r farn nad yw sancsiynau’n ddigonol i ddiogelu’r cyhoedd a’i fod er budd y cyhoedd.
3. Rydym hefyd yn gosod safonau ar gyfer sefydliadau sy'n dal cofrestrau gwirfoddol ar gyfer galwedigaethau iechyd a gofal cymdeithasol ac yn achredu'r rhai sy'n eu bodloni.
4. Rydym yn rhannu arfer da a gwybodaeth, yn cynnal ymchwil ac yn cyflwyno syniadau newydd i'n sector. Rydym yn monitro datblygiadau polisi yn y DU ac yn rhyngwladol ac yn rhoi cyngor ar faterion yn ymwneud â safonau proffesiynol mewn iechyd a gofal cymdeithasol.
5. Gwnawn hyn i hybu iechyd, diogelwch a lles defnyddwyr gwasanaethau iechyd a gofal cymdeithasol a'r cyhoedd. Rydym yn gorff annibynnol, yn atebol i Senedd y DU.
6. Ein gwerthoedd yw – uniondeb, tryloywder, parch, tegwch a gwaith tîm – ac rydym yn ymdrechu i sicrhau eu bod yn greiddiol i’n gwaith.
7. Yn ein hadroddiad Gofal mwy diogel i bawb – atebion o reoleiddio proffesiynol a thu hwnt a gyhoeddwyd ym mis Medi 2022, er mwyn helpu i fynd i’r afael ag argyfwng y gweithlu, argymhellwyd y dylai pedair Llywodraeth y DU weithio gyda’i gilydd i ddatblygu strategaeth gydlynol ar gyfer rheoleiddio pobl, i gefnogi darpariaeth eu strategaethau gweithlu iechyd a gofal cymdeithasol cenedlaethol.'
8. Mae rhagor o wybodaeth am ein gwaith a’r dull a gymerwn ar gael yn www.professionalstandards.org.uk