Archwilio sut y gall rheoleiddio proffesiynol hyrwyddo diwylliant diogelwch

Seminar Datblygiadau Rheoleiddiol a’r Cyd-destun Cymreig 2025 

Ar 25 Mawrth, cynhaliodd y PSA a Llywodraeth Cymru yr wythfed seminar flynyddol, Datblygiadau Rheoleiddiol a’r Cyd-destun Cymreig , gan ganolbwyntio ar sut y gall rheoleiddio proffesiynol hybu diwylliant diogelwch. Roedd dros 100 o gynrychiolwyr yn bresennol i wrando ar gyflwyniadau a thrafodaethau ar:

• Sut gall rheolyddion, cyflogwyr a grwpiau proffesiynol gydweithio i wella diogelwch?
• Sut gall addysg a hyfforddiant hybu diwylliant diogelwch? 
• Sut y gellir defnyddio data i wella diogelwch a beth yw'r ffordd orau i ni ymgysylltu'r cyhoedd â data?

Traddodwyd y prif anerchiad gan Sue Tranka, Prif Swyddog Nyrsio Cymru a Chyfarwyddwr Nyrsio GIG Cymru. 

Yn y sesiwn gyntaf, nododd Jeremy Miles AS, Ysgrifennydd y Cabinet dros Iechyd a Gofal Cymdeithasol, ei weledigaeth ar gyfer y GIG yng Nghymru a’r rôl y gall rheoleiddio proffesiynol ei chwarae wrth gyflawni hyn.

Daeth Jeremy Miles â’i sesiwn i ben gyda dau sylw sy’n unigryw i Gymru: yn gyntaf, mae angen cydweithio agos rhwng llunwyr polisi, staff, a’r cyhoedd i ddatblygu rheoliadau effeithiol a chynhwysol; ac yn ail, mae arweinyddiaeth system effeithiol yn bwysig i ysbrydoli ac ysgogi canlyniadau gwell.

Defnyddio Data i Ysgogi Gwelliannau Diogelwch

Amlygodd yr ail sesiwn rôl ganolog data wrth wella diogelwch ar draws gwasanaethau gofal iechyd. Roedd hyn yn cynnwys:

• Mae casglu data’n effeithiol yn bwysig ond nid yw’n hawdd
• Codio clinigol yw sylfaen monitro ansawdd ond a ydym yn mesur y pethau cywir?
• Mae safbwyntiau cleifion yn bwysig

Sut Gall Rheoleiddwyr, Cyflogwyr, a Grwpiau Proffesiynol Gydweithredu i Wella Diogelwch?

Roedd y drydedd sesiwn yn canolbwyntio ar gydweithio rhwng rheoleiddwyr, cyflogwyr a grwpiau proffesiynol i wella diogelwch. Canolbwyntiodd y trafodaethau ar rymuso unigolion i godi llais a meithrin diwylliant o gydweithio.

Pwysleisiodd siaradwyr o'r Cyngor Meddygol Cyffredinol (GMC) ac Unsain bwysigrwydd cydweithio yn ogystal â'r heriau y mae staff gofal iechyd yn eu hwynebu o ran eu diogelwch eu hunain a diogelwch cleifion a sut i annog diwylliant o godi llais.

Daeth y sesiwn i ben gyda Holi ac Ateb, lle trafodwyd cynaliadwyedd system dwy haen o reoleiddio statudol i rai, ond cofrestru gwirfoddol i eraill. 

Sut Gall Addysg a Hyfforddiant Hyrwyddo Diwylliant Diogelwch?

Yn y sesiwn olaf, buom yn archwilio sut y gall addysg a hyfforddiant hybu diwylliant diogelwch. Y thema gyffredinol a bwysleisiwyd gan siaradwyr yn ystod eu cyflwyniadau oedd yr angen am arweinyddiaeth dosturiol yn ogystal â diwylliant agored, cydweithredol lle mae rheoleiddio ac addysg yn cefnogi ei gilydd i wella diogelwch cleifion. Roedd y pynciau’n cynnwys:

• Pa rôl mae arweinyddiaeth dosturiol yn ei chwarae wrth hyrwyddo diwylliant diogelwch?
• Beth yw rôl rheoleiddio wrth greu diwylliant cydweithredol?

Dilynwyd pob sesiwn gan sesiwn holi-ac-ateb i roi cyfle i gynrychiolwyr ofyn cwestiynau a thrafod ymhellach y pwyntiau a godwyd yn ystod y cyflwyniadau.