Ymateb y PSA i gyhoeddiad y Llywodraeth ar gryfhau atebolrwydd uwch Reolwyr y GIG yn Lloegr

Rydym yn croesawu cynigion yr Adran Iechyd a Gofal Cymdeithasol (DHSC) i gryfhau atebolrwydd uwch reolwyr y GIG yn Lloegr drwy greu cynllun gwahardd ar gyfer y rhai sy'n cyflawni camymddwyn difrifol, i'w redeg gan y Cyngor Proffesiynau Iechyd a Gofal (HCPC). Mae'n gadarnhaol bod yr DHSC wedi nodi y bydd hyn yn rhan o becyn o fesurau i gryfhau arweinyddiaeth o fewn y GIG, ochr yn ochr â'r fframwaith arweinyddiaeth a rheolaeth sydd wrthi'n cael ei ddatblygu gan GIG Lloegr. Bydd hyn yn cynnwys safonau proffesiynol a chod ymarfer cenedlaethol sengl sy'n ymdrin â didwylledd ac atebolrwydd ar gyfer mecanweithiau i gofnodi ac ymateb i bryderon diogelwch cleifion yn effeithiol.

Rydym hefyd yn croesawu ymrwymiad y DHSC i sefydlu coleg newydd o arweinyddiaeth weithredol a chlinigol, i gefnogi a phroffesiynoli rheolwyr ar draws y GIG ac yn edrych ymlaen at weld rhagor o fanylion am hyn maes o law.

Nodwn ar hyn o bryd y bydd y cynllun gwahardd yn eithrio arweinwyr o fewn gofal sylfaenol, y sector annibynnol a gofal cymdeithasol ond rydym yn croesawu'r ymrwymiad yn yr ymateb i'r ymgynghoriad i gadw hyn dan adolygiad ac ystyried ymestyn cwmpas y rheoleiddio i fwy o rannau o'r system maes o law.       

Dywedodd Alan Clamp, Prif Weithredwr y PSA: "Rydym yn croesawu'r cynigion hyn a ddylai helpu i sicrhau bod uwch reolwyr sy'n gweithredu o fewn y GIG yn cynnal safon briodol o gymhwysedd ac ymddygiad. Wrth i'r cynlluniau ar gyfer y cynllun gwahardd gael eu datblygu, bydd yn bwysig ystyried y goblygiadau ar gyfer mynediad ledled y DU at ofal iechyd a sut y gellir amddiffyn y cyhoedd ni waeth ble maent yn byw. Bydd hefyd yn bwysig sicrhau cyfathrebu clir â'r holl randdeiliaid ynghylch sut mae hyn yn cyd-fynd â mecanweithiau rheoleiddio presennol."

Bydd y PSA yn monitro cynigion yn agos wrth iddynt gael eu datblygu ac yn ystyried ymhellach unrhyw oblygiadau ar gyfer ein goruchwyliaeth o'r HCPC, mewn partneriaeth â'r DHSC a GIG Lloegr.